|
呢排熱身賽頻頻有直播，聽朝美職明星隊加拿大多倫多對自英超韋斯咸亦唔例外。雖話呢場係表演賽性質，但實情美職方面非常緊呢個盃，對親外隊特別落力，加上碧咸今次處子代表明星隊上陣，帶住成隊美職球星倒戈英超球隊韋斯咸，梗係唔衰得，主勝要得過！（now633台周五早上7:00直播）
唔好以為美職明星隊得個名，實情呢隊波由網上球迷、美職練、球員同傳媒各佔二成五比率，投票選出，最後十八位球員可以講係美職精英中精英，當中包括首次入選碧咸，難得到美國都有得倒戈英超球隊，英國方面仲有電視台直播，卡比路隨時睇住，梗係要加多兩錢肉緊。再加上安祖及白蘭高等球星，前利物浦名宿尼高旗，呢支美職明星隊陣容絕對拍得住歐洲一線勁旅。
近6次對外隊贏足5次
事實上，美職亦非常重視呢個盃，近六次對外隊贏足五次，最近兩屆更先後擊敗車路士同些路迪未失一球，正如曾七次代表明星隊當路雲話齋，入得明星隊絕對唔係講玩，係一次黃金機會證明畀全世界人睇證明自己，兼博歐洲球會垂青，戰意可謂爆晒燈。
古比士利愛用新人
至於韋斯咸方面，佢日前作客贏哥倫布機員三比一，不過隨隊球迷半場卻同對方球迷發生打鬥，嚴重影響形象，呢鋪肯定被人噓爆都似。另外，從過去兩場熱身賽睇，領隊古比士利周不時派新人上陣，就算今場有般莫迪同艾法寧頓傷愈復出，亦唔見得比明星隊優勝，呢鋪都係捧番有半個主場之利明星隊贏波穩陣。
|
