|
美國體壇興玩明星賽，足球當然亦唔例外，美職明星隊聽朝就會於多倫多出戰韋斯咸。呢種賽事純粹搞噱頭，甚至搵樂隊半場休息時間表演助興，最緊要有氣氛，勝負只屬次要，相信交戰雙方會大踢進攻足球，以入波娛樂球迷，入球大係不二之選。（now 633周五早上7時直播）
美職明星賽九六年已經開始舉行，當時賽制同ＮＢＡ一樣，由東岸球員對西岸球員，期間幾經轉變。賽會為加強向全世界推廣美職，近年改為邀請外隊參賽，而且集中搵來同操英語英國兵團，富咸、車路士及些路迪都曾經參賽過。雖然今屆只係請來韋斯咸，不過仍然有一大賣點，就係碧咸將會首次呢項比賽披甲，令賽事星味大增，成為名副其實明星賽。
兩軍火力都咁猛
有碧咸妙傳，一眾隊友唔愁冇入波機會，佢力洛杉磯銀河係今季聯賽入波最多球隊，開大比率超過八成，就係最佳證明。而且美職明星隊集齊各隊精英，包括墨西哥「夾波王」白蘭高、堅尼谷巴、安祖及咸哥好拍檔當路雲等攻擊好手，人腳質素高，大大提升球隊入波能力，唔會令球迷失望。
至於韋斯咸近期熱身賽表現對辦，兩連勝兼合共攻入七球，包括上仗以三比一擊敗美職球隊哥倫布機員。事實上，韋斯咸今次美國之旅收唔少戲金，亦唔敢流攤，三大射手艾殊頓、比拿美及卡頓高爾等主將，都有隨隊，可望踢出正常水準。今場賽事門票已經賣晒，全場爆棚情況之下，雙方勢必鬥攻，合演入球騷。
|
