|
咪以為多蒙特今晚主場對拜仁慕尼黑係熱身賽咁簡單，實情呢場係非正式超級盃，加上兩隊屬世仇關係，就算拜仁一班球星歸晒隊，講明派最強十一人應戰，相信亦唔易多蒙特主場作惡；考慮到兩軍近期鋒力都唔錯，朱楓認為呢場入球大至抵玩！（開賽時間：周四凌晨2:30）
德國超級盃八七至九六年係德國官方正式盃賽，到九七年先被德國聯賽盃取代。唔講唔知，多蒙特同雲達不來梅係史上過超級盃最多球隊，各有三次，其中多蒙特八九年贏拜仁四比三一役更被奉為經典。雖然超級盃今年以非官方名義復辦，但話晒多蒙特主場舉行，加上對手係死敵拜仁，多蒙特方面非常重視，仲話明要報番上季德國盃決賽一敗之仇！
奇哥話明出強陣
其實多蒙特今季「神奇練」高普上任後，季前熱身賽表現唔錯，獲三勝一和，當中仲有三場賽事射入兩球。陣容方面，雖然中場汀加因傷抖三周，不過早排踢歐國盃射手柏歷同中堅羅拔高華都已經歸隊，前者更上場贏柏達邦賽事入波，無論拍基利莫域斯抑或希度華迪斯，攻擊力都唔可以輕視。
由新帥奇連士文執拜仁慕尼黑，早前三場熱身賽接連大炒對手，完全貫徹「奇哥」以往德國進攻足球，賽前佢表示，今仗將會派出最強十一人出戰，預計高路斯、普多斯基、舒韋恩史迪加同東尼等主力都會上陣，不過朱楓略嫌拜仁之前一系列熱身賽都係對住低組別球隊，加上門將雲昇欠缺經驗，對住死敵多蒙特唔係話贏就贏，轉玩1.8倍入球大似乎更正路。
|
