|
季前熱身賽不嬲都唔係理想出擊場合，不過由於大家對參與球會有較多認識，通常都忍唔住手，如果今晚真係要玩，力奇會建議可以一試慕遜加柏贏波，始終佢新兵表現對辦，兼有主場之利嘛。（開賽時間：周三晚11:30）
淨係睇睇上周末英超三雄踢熱身賽，唯一贏波阿仙奴都係先輸一球，到尾反勝二比一，至於曼聯同利物浦都係和波而回，就知季前熱身賽冇乜邊隊信得過。就講番今場慕遜加柏對海倫芬，雖然前者只係升上德乙，反而海倫芬係荷甲前列分子，但如果以為海倫芬可以秤高，我會提醒大家要小心跌落陷阱。
法甲內戰揀圖盧茲
事實上，慕遜加柏近排踢兩場熱身賽開始上力，對住德甲比勒費爾德同英超西布朗都係贏二比一，其中上仗對住西布朗表現尤其出色，新兵好似馬特莫亞同艾比文都獲得練路侯基大讚。反觀海倫芬自從賣走射手之一蘇利馬尼，換入球能力麻麻卡勞，結果上仗對住低組別FC燕豪芬，都夠膽死淨吞四蛋，今仗冇埋地利，更加捧唔過。
另外一場法甲內戰熱身賽，波爾多狀態似乎仲未谷得起，就算由AC借用加盟哥古夫已經開齋，但都唔係穩勝圖盧茲，今場我覺得揀4.3倍客勝好過。（開賽時間：周四凌晨1:00）
|
