|
車路士今晚廣東省奧林匹克體育場與FC廣州踢表演賽，雖然掛名表演，但實際上車路士唔會玩玩。一來新季度英超即將展開，球員都要靠實戰催谷狀態。二來球員要爭正選席位，必搏盡討新帥史高拉利歡心。正如史高拉利賽前所講，球隊每場比賽都為勝利，料今場表演賽車路士眾將必大打真軍，車仔讓到二球，都要捧「讓球客勝」。（now 632周三晚8時直播）
車路士球員於當地操練既積極又認真，唔似踢表演賽咁簡單，尤其中場靈魂林柏特早前受轉會消息纏擾，加上又有迪高來投同佢爭位，唔交足功課隨時正選都冇埋。而新加盟迪高及保辛華亦都要證明自己實力。新舊球員融合初期必構成一種良性競爭，對車路士有一定刺激作用。
FC廣州輸少當贏
另外，今場係史高拉利執車路士後首場比賽，點都希望頭威頭勢，為老闆阿布拉莫域及球迷建立起信心。賽前「大菲」就話上年曼聯廣州輕鬆以三比○取勝，佢亦希望球隊可以以相同姿態輕勝，仲講到明會派出大部分主力上陣。「大菲」對於自己執車路士首場比賽可謂志在必得，今場絕唔會同對手玩泥沙。
主隊FC廣州近期中超表現麻麻，成個七月都未贏過，本身主場成績又唔算突出，對認真作戰車路士難寄厚望，難怪賽前主練沈祥福都話要打守勢波，以盡量減少失球為首要目標。FC廣州未踢先輸信心，又點同車路士鬥？
|
