|
哈化柏林今晚同利物浦拍跳，計牌面紅軍冇錯係勝一籌，但球隊未齊腳，隊長謝拉特又傷埋，對住操到Fit晒哈化好難惡得出樣。況且哈化方面一早就賣出超過三萬張波飛，自己地頭出擊聲勢浩大，贏埋利記都唔奇，主勝諗得過！（有線61及64周三凌晨1:45直播）
哈化早前歐協盃首圈以八比一狂數摩爾多瓦球隊尼斯杜，睇到班球員狀態唔曳。最重要係練法維已定正選陣容，班主將夾慣夾熟，經過近仗磨合後，狀態同默契肯定得到進一步提升。
紅軍首兩場熱身賽只係小勝燦美爾同盧塞恩，上仗對住有番咁上下克拉科夫仲踢到扯晒蝦，一眾戰將明顯未Fit。好似費蘭度托利斯、沙比阿朗素、艾比路亞同門將連拿仲放緊假，隊長謝拉特因鼠蹊受傷要抖七至十日，以紅軍近期友賽表現，真係睇唔出呢支英超勁旅有乜本事柏林威！
|
